Fri, 23 June 2017
Your Visitor Number :-   1051444
SuhisaverSuhisaver Suhisaver
ਵਿਧਾਨ ਸਭਾ 'ਚ ਹੰਗਾਮਾ; 'ਆਪ' ਵਿਧਾਇਕ ਦੀ ਪੱਗ ਲੱਥੀ               ਮੀਰਾ ਕੁਮਾਰ ਰਾਸ਼ਟਰਪਤੀ ਅਹੁਦੇ ਲਈ ਵਿਰੋਧੀ ਧਿਰ ਦੀ ਉਮੀਦਵਾਰ              

ਧੀ ਨੂੰ ਸੰਬੋਧਨ - ਡਾ. ਸੁਰਜੀਤ

Posted on:- 10-03-2017

suhisaver

ਮੈਂ ਦੇਖਣਾ ਚਾਹੁੰਨਾ
ਕੀ ਮੈਂ ਤੈਨੂੰ ਪਿਆਰ ਕਰ ਸਕਦਾ ਹਾਂ ਕਿ ਨਹੀਂ
ਜੇ ਤੂੰ ਝਾਂਸੀ ਦੀ ਰਾਣੀ ਨਾ ਬਣੇ, ਨਾ ਬਣੇ ਮਾਈ ਭਾਗੋ
ਨਾ ਸੁਨੀਤਾ ਵਿਲੀਅਮਜ਼ ਜਾਂ ਮਦਰ ਟੈਰੀਸਾ।

ਜੇ ਤੂੰ ਸਵੇਰੇ ਉੱਠੇਂ ਦੇਰ ਨਾਲ ਅਲਸਾਈ ਜਿਹੀ
ਮਨ ਮਰਜ਼ੀ ਨਾਲ ਤਿਆਰ ਹੋਵੇਂ
ਮੈਨੂੰ ਬਿਨਾ ਦੱਸਿਆਂ ਘਰ ਤੋਂ ਚਲੀ ਜਾਵੇਂ
ਸਹੇਲੀਆਂ ਨਾਲ ਬਜ਼ਾਰ ਦੀ ਗੇੜੀ ਲਾਉਣ ਜਾਂ
ਯੂਨੀਵਰਸਿਟੀ ਦੀ ਕੈਂਟੀਨ ਦੇ ਕੋਲ ਬੈਠ
ਮੁੰਡਿਆਂ ਕੁੜੀਆਂ ਨਾਲ ਗੱਲਾਂ ਮਾਰ ਕੇ ਬਿਤਾ ਦੇਵੇਂ ਸਾਰਾ ਦਿਨ
ਫ਼ਿਰ ਜਦੋਂ ਦੇਰ ਸ਼ਾਮ ਘਰ ਆਵੇਂ ਤਾਂ ਪਿਆਰ ਭਰੀ ਤੱਕਣੀ ਤੇਰਾ ਸਵਾਗਤ ਕਰੇ।
ਮੈਂ ਦੇਖਣਾ ਚਾਹੁੰਨਾ
ਕੀ ਮੈਂ ਤੈਨੂੰ ਪਿਆਰ ਕਰ ਸਕਦਾ ਹਾਂ ਕਿ ਨਹੀਂ
ਜਿਵੇਂ ਮੇਰੀ ਮਾਂ ਕਰਦੀ ਸੀ।

ਤੂੰ ਮਹਾਨ ਬਣਨ ਦੀ ਸ਼ਰਤ ਤੋਂ ਮੁਕਤ
ਆਜ਼ਾਦੀ ਨਾਲ ਵਿਚਰਦੀ ਰਹੇਂ
ਕੁਝ ਮਨ ਮਰਜ਼ੀ ਦਾ ਬਣਨ ਦੀ ਚਾਹਤ ਨਾਲ।
'ਘਰ' ਦੀ ਇੱਜ਼ਤ ਦੇ ਬੋਝ ਨੂੰ ਢੋਣ ਦੀ ਜ਼ਿੰਮੇਵਾਰੀ ਤੋਂ ਸੁਰਖ਼ਰੂ
ਤੂੰ ਆਪਣੇ ਦਿਲ ਦੀ ਆਵਾਜ਼ ਮੁਤਾਬਿਕ ਕਰੇਂ ਆਪਣੇ ਫ਼ੈਸਲੇ।
ਬੁਢਾਪੇ ਵਿਚ ਪੁੱਤਰ ਨਾਲੋਂ ਜ਼ਿਆਦਾ ਮੋਹਵੰਤ ਸਾਬਿਤ ਹੋਣ ਤੋਂ ਬਿਨਾਂ
ਗੰਢ ਸਕੇਂ ਬਹੁਤ ਸਾਰੇ ਮੋਹ-ਮੁਹੱਬਤ ਦੇ ਰਿਸਤੇ।
ਮੈਂ ਦੇਖਣਾ ਚਾਹੁੰਦਾ ਹਾਂ।
ਮੈਂ ਫੇਰ ਵੀ ਤੈਨੂੰ ਪਿਆਰ ਕਰ ਸਕਦਾ ਹਾਂ ਕਿ ਨਹੀਂ
ਜਿਵੇਂ ਮੇਰੇ ਮਾਂ ਬਾਪ ਕਰਦੇ ਰਹੇ।

ਲਾਜ-ਸ਼ਰਮ ਦੇ ਗਹਿਣੇ ਲਾਹ ਕੇ ਘਰ 'ਤੇ ਘਰ ਤੋਂ ਬਾਹਰ
ਆਪਣੇ ਨਾਲ ਹੁੰਦੀਆਂ ਵਧੀਕੀਆਂ ਬਾਰੇ ਬੋਲੇਂ ਹੋ ਕੇ ਬੇਲਿਹਾਜ਼।
ਤੂੰ ਲੜ ਸਕੇਂ ਮਾਂ ਅਤੇ ਪਿਤਾ ਅੰਦਰ ਛੁਪੇ ਮਰਦਾਂ ਨਾਲ
ਧੀਆਂ ਅੰਦਰ ਸਦੀਆਂ ਤੋਂ ਛਹਿ ਕੇ ਬੈਠੀ ਸੋਹਲ-ਸੁੰਦਰ-ਸ਼ਾਲੀਨ ਔਰਤ ਨਾਲ।
ਤੂੰ ਔਰਤ ਦੇ ਬਣੇ ਬਣਾਏ ਸਾਂਚੇ ਨੂੰ ਭੰਨ ਕੇ
ਬਣਾ ਲਵੇਂ ਬੰਦਿਆਈ ਦੀ ਆਪਣੀ ਪਰਿਭਾਸ਼ਾ।
ਤੂੰ ਭੁੱਲ ਜਾਂਵੇ ਔਰਤ-ਮਰਦ ਦਾ ਫ਼ਰਕ
ਸਾਰਾ ਸੰਸਾਰ ਤੇਰਾ ਘਰ ਬਣ ਜਾਵੇ ਤੇ ਸਾਰੀ ਮਨੁੱਖਤਾ ਤੇਰੀ ਮੁਹੱਬਤ।
ਜਦ ਬੋਝ ਬਣਨ ਤਾਂ ਲਾਹ ਸੁੱਟੇਂ ਗਹਿਣੇ ਪਿਆਰ, ਸੁਹਲਪੁਣੇ ਅਤੇ ਸਮਾਈ ਦੇ
ਲੋੜ ਪਵੇਂ ਤਾਂ ਚੁੱਕ ਲਵੇਂ ਹਥਿਆਰ ਹਿਕਾਰਤ, ਬਦਬਖ਼ਤੀ ਤੇ  ਲੜਾਈ ਦੇ।
ਮੈਂ ਦੇਖਣਾ ਚਾਹੁੰਦਾ ਹਾਂ।
ਮੈਂ ਫੇਰ ਵੀ ਤੈਨੂੰ ਪਿਆਰ ਕਰ ਸਕਦਾ ਹਾਂ ਕਿ ਨਹੀਂ।

Comments

Arash Bindu

ਬਹੁਤ ਵਧੀਅਾ ਕਵਿਤਾ...

Harjit Kaur

Very nice...

Name (required)

Leave a comment... (required)

Security Code (required)



ਕਾਵਿ-ਸ਼ਾਰ

ਆਬ ਪਬਲੀਕੇਸ਼ਨਜ਼ ਵੱਲੋਂ ਪ੍ਰਕਾਸ਼ਿਤ ਪੁਸਤਕਾਂ