Tue, 13 April 2021
Your Visitor Number :-   4426299
SuhisaverSuhisaver Suhisaver
ਯੋਗੀ ਅਦਿੱਤਿਆਨਾਥ ਦੀ ਇੱਕ ਹੋਰ ਨਫ਼ਰਤੀ ਤਕਰੀਰ , ਕਿਹਾ ਜੇ 'ਲਵ ਜਿਹਾਦ' ਚਲਾਉਣ ਵਾਲੇ ਨਾ ਸੁਧਰੇ ਤਾਂ 'ਰਾਮ ਨਾਮ ਸੱਤਯ ਹੈ' ਦੀ ਯਾਤਰਾ ਸ਼ੁਰੂ ਹੋਵੇਗੀ               ਪੰਜਾਬ ਤੋਂ ਬਾਅਦ ਹੁਣ ਰਾਜਸਥਾਨ ਵਿਧਾਨ ਸਭਾ ਵਿੱਚ ਵੀ ਕੇਂਦਰੀ ਖੇਤੀ ਕਾਨੂੰਨਾਂ ਨੂੰ ਬੇਅਸਰ ਕਰਨ ਲਈ ਤਿੰਨ ਬਿੱਲ ਪੇਸ਼               ਖੇਤੀ ਕਾਨੂੰਨ : ਹੁਣ ਹੰਸ ਰਾਜ ਹੰਸ ਕਿਸਾਨਾਂ ਨੂੰ ਸਰਕਾਰ ਨਾਲ ਗੱਲਬਾਤ ਲਈ ਸੱਦਾ ਦੇਣ ਲੱਗਾ               ਭਾਜਪਾ ਹਾਈਕਮਾਨ ਦਾ ਫ਼ਰਮਾਨ! ਕਿਸਾਨਾਂ ਨਾਲ ਰਾਬਤਾ ਬਣਾਏ ਪੰਜਾਬ ਇਕਾਈ               ਭਾਜਪਾ ਨੂੰ ਇੱਕ ਹੋਰ ਝਟਕਾ, ਖੇਤੀ ਕਾਨੂੰਨਾਂ ਖ਼ਿਲਾਫ਼ ਭਾਜਪਾ ਦੇ ਪੰਜਾਬ ਯੂਥ ਜਨਰਲ ਸਕੱਤਰ ਬਰਿੰਦਰ ਸਿੰਘ ਸੰਧੂ ਨੇ ਅਸਤੀਫ਼ਾ ਦਿੱਤਾ              

ਘਰ ਹੁੰਦਾ ਸੀ ਇੱਕ -ਡਾ. ਅਮਰਜੀਤ ਟਾਂਡਾ

Posted on:- 22-05-2016

suhisaver

ਘਰ ਹੁੰਦਾ ਸੀ ਇੱਕ
'ਕੱਠੀਆਂ ਕਰ ਰੀਝਾਂ ਡਾਉਣ ਜੋਗਾ
ਅੰਗੀਠੀਆਂ ਕਿੱਲੀਆਂ ਸਜਾਉਣ ਵਾਲਾ
ਰਸੋਈ 'ਚ ਸੂਰਜ ਪਕਾਉਣ ਵਾਲਾ
ਸੁੰਨ੍ਹਾ ਜੇਹਾ ਬੈਠਾ ਹੈ ਅੱਜਕਲ-

ਕੋਈ ਹੋਰ ਸੁੰਬਰਦਾ, ਵਿਹੜਾ
ਸ਼ਿੰਗਾਰਦਾ ਹੈ ਦੀਵਾਰਾਂ
ਪਾਣੀ ਕਦੇ ਕਦੇ ਪਾਉਂਦਾ ਹੈ ਕੋਈ
ਸਾਡੇ ਬੀਜੀ ਦੇ
ਲਾਏ ਸੁਪਨਿਆ ਨੂੰ-

ਓਦਣ ਦੇ ਫੁੱਲ ਵੀ ਕਿਹੜਾ ਹੱਸੇ ਨੇ ਕਦੇ ਨਿਮਾਣੇ-
ਮਾਂ ਦੀਆਂ ਛੁਹਾਂ
ਏਦਾਂ ਬੈਠੀਆਂ ਉਡੀਕਦੀਆਂ ਹਨ
ਜਿਵੇਂ ਹੁਣੇ ਹੀ ਬੀ ਜੀ ਨੇ ਕਿਤਿਓਂ ਆ ਜਾਣਾ ਹੋਵੇ-

ਤੇ ਆ ਕੇ ਪੁੱਛੇਗੀ-
ਨੀ ਆਹ ਹਾਲ ਕਰਨਾ ਸੀ ਘਰ ਦਾ
ਜੇ ਮੈਂ ਜਰਾ ਅਰਸ਼ ਤੇ ਚਲੀ ਗਈ ਸਾਂ
ਨਾ ਏਸ ਲਈ ਛੱਡ ਕੇ ਗਈ ਸੀ ਤੈਨੂੰ ਮੈਂ
ਕਿ ਘਰ ਦੀ ਦਸ਼ਾ ਹੀ ਵਗਾੜ ਦੇਵੇਂ-

ਘਰ ਸੋਚੇਗਾ
ਕਿ ਮੋਹ ਵੀ ਕਦੇ ਮਰਦੇ ਨੇ-
ਰੂਹਾਂ ਵੀ ਕਦੇ ਛੁਪਦੀਆਂ ਨੇ-
ਫਿਰ ਸ਼ਾਮ ਪਈ
ਪਾਪਾ ਵੀ ਆ ਜਾਣਗੇ
ਥੱਕੇ ਟੁੱਟੇ ਕੰਮ ਤੋਂ
ਸਾਈਕਲ ਰੱਖ ਨਹਾ ਧੋ ਕੇ -
ਵਲੈਤੀ ਦਾਰੂ ਦਾ ਪੈੱਗ ਪਾਉਣਗੇ
ਤੇ ਕਹਿਣਗੇ ਲਿਆਓ ਰੋਟੀ
ਕੀ ਬਣਾਇਆ ਹੈ ਅੱਜ?

ਤਾਜ਼ੇ ਤੜਕੇ ਸਾਗ ਚ
ਤਰਦੇ ਘਿਓ ਦੀ ਲਜ਼ਤ ਵੰਡੇਗੀ ਖੁਸ਼ਬੂਆਂ-
ਅੰਬ ਦੇ ਅਚਾਰ ਤੇ ਮੂਲੀ ਗਾਜ਼ਰ ਮਿਰਚ ਟਮਾਟਰ
ਨਾਲ ਮਹਿਕੇਗਾ ਚੌਂਕਾ-

ਵਿਹੜਾ ਫਿਰ ਨੱਚੇਗਾ ਗਾਏਗਾ
ਨਿੱਕੇ ਆਉਣਗੇ ਪੜ੍ਹ ਕੇ
ਪੱਠਿਆਂ ਦਾ ਕੰਮ ਕਾਰ ਮੁਕਾ
ਰੋਟੀ ਤੋਂ ਵਿਹਲੇ ਹੋ-
ਕੱਢਣਗੇ ਅਲਜਬਰੇ ਦੇ ਸਵਾਲ-
ਲਿਖਣਗੇ ਲੇਖ-ਵਿਸਾਖੀ ਦੇ ਮੇਲੇ ਤੇ-
ਗੁਆਂਢਣ ਆਵੇਗੀ-ਕੀ ਧਰਿਆ ਹੈ ਚਾਚੀ-
ਆਹ ਦੇਵੀਂ ਇੱਕ ਕੌਲੀ ਸਾਗ ਦੀ-

ਫਿਰ ਵੇਲਾ ਆਵੇਗਾ
ਮੰਜੇ ਵਿਛਾਉਣ ਦਾ
ਥਕਾਵਟਾਂ ਨੂੰ ਅਰਾਮ ਨਾਲ ਲਿਟਾਉਣ ਦਾ-

ਬਿਸਤਰਿਆ ਤੇ ਟੱਪਾਂਗੇ ਨੱਚਾਂਗੇ
ਝਿੜਕਾਂ ਪੈਣਗੀਆਂ ਰੋਜ਼ ਵਾਂਗ-
ਪਹਿਲਾਂ ਵੇਖਾਂਗੇ-ਧਰੂ ਕਿੱਥੇ ਹੈ-
ਚੋਰ ਸਿਪਾਹੀ ਵੀ ਨਹੀਂ ਦਿਸਦੇ-
ਚੰਨ ਵੀ ਅੱਜ ਲੁਕਦਾ ਛੁਪਦਾ ਹੈ-

ਦਾਦੀ ਬਾਤ ਪਾਏਗੀ
ਹੌਲੀ ਹੌਲੀ ਨੀਂਦ 'ਚ ਹੁੰਗਾਰਾ ਬੰਦ ਹੋ ਜਾਵੇਗਾ
ਦਾਦੀ ਪੁੱਛੇਗੀ-ਲੈ ਸੌਂ ਵੀ ਗਏ ਸਾਰੇ-

ਘਰ ਸੀ ਉਹ
ਜਿਥੇ ਚੀਜ਼ਾਂ ਨੂੰ ਖਿੱਲਰਣ ਦੇ ਚਾਅ ਸਨ-
ਲੁਕਣਮੀਟੀ ਹੁੰਦੀ ਸੀ ਜਿਥੇ-
ਚਾਚੀਆਂ ਤਾਈਆਂ ਵਰਗੀਆਂ
ਪੀੜੀਆਂ ਡੱਠਦੀਆਂ ਟੁੱਟਦੀਆਂ ਸਨ-
ਸੁਪਨਿਆਂ ਵਾਂਗ ਮਿਲਦੇ ਸਨ ਫਾਂਟਾਂ ਵਾਲੇ ਪਜ਼ਾਮੇ
ਚਾਦਰਾਂ ਘਸ ਘਸ ਪਾਟਦੀਆਂ ਸਨ-

ਨਵੇਂ ਝੱਗੇ ਮਿਲਦੇ ਸਨ-ਵਿਆਹਾਂ ਵਾਂਗ
ਨਵੇਂ ਸਾਈਕਲ ਨੂੰ ਦੇਖਣ ਗੁਆਂਢ ਆਉਂਦਾ ਸੀ
ਰੇਡੀਓ ਵਾਲੇ ਘਰ ਭਰਦੇ ਸਨ ਖਬਰਾਂ ਵੇਲੇ
ਟੁਣੀਆਂ ਰਾਮ ਤੇ ਮਾਸਟਰ ਜੀ ਹੀ ਸਿਤਾਰੇ ਸਨ ਪਿੰਡਾਂ ਦੇ-
ਕੌਣ ਜਾਣਦਾ ਸੀ -ਚੰਦੀਗੜ ਤੇ ਦਿੱਲੀ

ਦਿਨ ਰਾਤ ਵਿਵਿਧ ਭਾਰਤੀ ਤੇ
ਸੀਲੋਨ ਤੋਂ ਹੀ ਸੁਣਦੇ ਸਾਂ ਹਿੰਦੀ ਦੇ ਨਗਮੇਂ
ਜਾਂ ਲਹੌਰ ਤੋਂ ਨੂਰਜਹਾਂ ਦੇ ਗੀਤ-
ਪਰਾਹੁਣਾ ਆਉਣਾ

ਤਾਂ ਚਾਅ ਚੜ੍ਹ ਜਾਣੇ ਪਿੰਡ ਨੂੰ-
ਨਵੇਂ ਮੇਜ਼ਪੋਸ਼,ਦਰੀਆਂ ਵਿਛਦੀਆਂ ਸਨ ਪਿੰਡਾਂ ਚ
ਬੱਚਿਆਂ ਨੂੰ ਕੁਝ ਖਾਣ ਨੂੰ ਮਿਲਦਾ ਸੀ
ਚੀਜ਼ੀ ਲੈ ਕੇ ਆਈ ਮਾਸੀ ਭੂਆ
ਦਾ ਝੋਲਾ ਪਹਿਲਾਂ ਫੋਲਦਾ ਸੀ ਜਹਾਨ-

ਓਹੀ ਘਰ ਟੋਲਦੇ ਦੇਖੇ
ਘਰਾਂ ਨੂੰ ਪਰਤੇ ਮੇਰੇ ਬੁੱਢੇ ਹੋਏ ਦੋਸਤ-
ਕੁੜੀਆਂ ਚਿੜੀਆਂ ਦਾਦੀਆਂ ਬਣੀਆਂ
ਪੇਕੇ ਮਾਪੇ ਲੱਭਦੀਆਂ-

Comments

Security Code (required)



Can't read the image? click here to refresh.

Name (required)

Leave a comment... (required)





ਕਾਵਿ-ਸ਼ਾਰ

ਆਬ ਪਬਲੀਕੇਸ਼ਨਜ਼ ਵੱਲੋਂ ਪ੍ਰਕਾਸ਼ਿਤ ਪੁਸਤਕਾਂ